Жағымды жаңалықтар

Павлодар да қоныстанушыларды қарсы алуда

Өткен аптада «Оңтүстіктен – Солтүстікке» қоныс аудару бағдарламасы бойынша Павлодардан делегаттық топ Түркістан облысына келіп, бірқатар аудандарды аралаған еді. Осыған орай, бізге сол топтың бір мүшесі Нұржамал Жақсылыққызымен сөйлесудің сәті түсті.

«Біз отбасымызбен бірге 2019 жылы Арыс қаласынан Павлодар облысы, Тереңкөл ауданы, Жаңа бет ауылына көшіп барғанбыз, – деп бастады әңгімесін Нұржамал ханым. – Онда барысымен мектепке оқу ісінің орынбасары болып жұмысқа тұрдым. Мектеп директоры болуға ұсыныс білдірген. Алайда оған келіспедім. «Завуч» болып бір жылдай істеп, кейін қайтадан мұғалім болып ауысып кеттім. Себебі мұғалім болсаң еңбекақы сағатыңа қарай төленеді. Әрі үй шаруасымен айналысуға да уақытың болады. Қазір 32 сағатпен жұмыс істеп жүрмін. Ал отағасы шаруашылық қожалығына күзетші болып жұмысқа орналасты. Шымкентте күзетшінің айлық жалақысы 40-50 мың теңге төңірегінде болса, ол жақта 100 мың теңгеден кем емес.

2020 жылдан бері ішкі көші-қонмен айналысамын. Әрі журналисттік зерттеу агенттігінің өкілімін. Әкімдік, көші-қон, жұмыспен қамту бөлімдерімен бірге жұмыс істейміз. Чаттар ашып, онда түсіндіру жұмыстарын жүргізіп, керекті ақпараттар беріп  отырамыз.

Бағдарламаны түсініп, Солтүстікке қоныс аударушылар саны күннен-күнге артып келеді. Биылғы жылы Павлодар облысына 2600 адамды қабылдау жоспарланған. 1- маусымдағы жағдай бойынша 972 адам көшіп келіп өңірлік квотаға енді.

Сөзім дәлелді болуы үшін айта кетсем, осыдан екі жыл бұрын біз көшіп барған кезде тұрғын үйлердің бағасы 200 мың, 300 мың теңге төңірегінде болатын. Көп үйлер иесіз бос тұрған еді. Қазір баға көтерілді. 700 мың, 800 мың теңге төңірегінде сатылып жатыр. Егер көшіп барушылар көп болмаса, үй бағасы да көтерілмес еді. Бұған біз секілді еріктілердің де қосқан үлесі мол деп есептеймін.

Солтүстікке қоныс аударуға ниеттілер болса, ол жақтың мынадай артықшылықтарын айтқым келеді: Ең бірінші тұрғын үймен, жұмыспен қамтамасыз етеді. Бизнеспен айналысамын деушілер болса, қайтарымсыз несие алып, қалаған бизнесін бастауына болады. Егін егіп, мал ұстаймын дейтіндерге айтарымыз, бұл жақтың топырағы құнарлы, шөбі шүйгін. Қара топырақты жер болғасын ба, арам шөп те көп шықпайды. Былтыр Мақтааралдан көшіп келген жігіттер қызанақ еккен. Мол өнім алды.

Әкімдер, басшылық қызметте отырғандар қара халықты тыңдайды, сөздеріне құлақ асады. Биыл да әкім оңтүстіктен барғандарды қабылдауына шақырып, не керегін сұрағанда әлгі қызанақ еккен жігіттер дарбыз егуге суармалы жер сұрады. Ауыл шаруашылығымен айналысамын деушілерге барлық жағдай жасалынған. Барлық пәннің мұғалімдеріне, дәрігерлерге, мал дәрігерлеріне, электрик, механизаторлар, сауыншыларға жұмыс көп».

Нұржамал Жақсылыққызымен әңгімелесіп, осы жағдайларды білдік. Төменде оқырмандардың назарына мына ақпаратты ұсынуды жөн көрдік.

Алматы, Жамбыл, Түркістан, Қызылорда, Маңғыстау Облыстары және Алматы, Астана, Шымкент қалалары тұрғындарының назарына! Солтүстік Қазақстан облысына қоныс аударушылар үшін!!!

Бағдарламаға қатысушыларға және оның отбасы мүшелеріне отағасына және әрбір отбасы мүшесіне бір реттік 35 айлық есептік көрсеткіш 102.095 теңге мөлшерінде көшуге материалдық көмек беріледі. Ал 1-ші сәуірден бастап оның мөлшері 204.190 теңгені құрайтын болады.

Бұдан бөлек, қоныс аударушыларға мынадай мүмкіндіктер беріледі:

* Қызметтік тұрғын үй немесе еңбекші жастар үшін тиісті бағдарлама шеңберінде салынған (сатып алынған) жатақханалардан бөлмелер беру;

* Қажет болған кезде техникалық және кәсіптік білім алу үшін оқытуға және қысқа мерзімді кәсіптік курстарға жіберу;

* Жаңа тұрғылықты жерінде жұмысқа орналасуға және кәсіпкерлікті дамытуға жәрдемдесу.

Сонымен қатар, бағдарламаға қатысушының (қоныс аударғандар) отбасына, оның ішінде жалғызбастыларына 12 ай бойы ай сайын тұрғын үйді жалдау және коммуналдық қызметтерге ақы төлеу бойынша шығындарды өтеуге мынадай мөлшерде материалдық көмек беріледі:

  1. Бір адам үшін – 15 АЕК (43.755 теңге);
  2. Отбасы мүшелерінің саны екеуден төртеуге дейін болса – 18 АЕК (52.506 теңге);
  3. Отбасы мүшелерінің саны бесеу және одан көп болған кезде – 21 АЕК (61.257 теңге) мөлшерінде төленеді.

Байланыс телефоны: 8 707 405 72 46, 8 776 366 00 74.

Г. СҰЛТАН.

Толығырақ

Ұқсас жазбалар

Back to top button