Біздің сұхбат

Шұбат пен саумалды үйде жатып-ақ іше аласыз

Шұбат пен саумалдың адам ағзасы үшін пайдалы сусын екені анық. Десе де әсіресе қала тұрғындары үшін бұл табиғи өнімге қол жеткізу оңайға соқпайтыны анық. Алайда енді жұрт шұбат пен саумалдың капсула түріндегісін қолдана алады. Мұны балалар­ға да беруге болады екен.

Негізгі өндіруші – «Saumal» компаниясы. Саумалдың құрғақ түрін өндіретін бұл зауыттың өзіндік тарихы да жоқ емес. Бұл кәсіпорынның негізін қалаушылардың бірі – Қыдырбек Мейрамбеков. Әу баста оның ұлы Ғалымжан Австрияда оқып жүріп, немістердің саумалды құрғақ күйінде шығарып жатқанын біледі. Содан соң бұл технологияны елімізге әкелу мақсатында бие сүтінің өндірісін қолға алған сол адамды іздеп та­ба­ды. Ол – Рудольф Шторх де­ген неміс екен. Рудольф бұл істі күйеу баласы Ганс Цольманға табыстаған көрінеді. Ғалымжан Ганс­қа Қазақстанда да осындай зауыт ашқысы келетінін жеткізіпті. Алғашында неміс азаматы қарсы бол­ған, бірақ кейін келісіп, «Saumal» компаниясымен келісім-шартқа отырыпты.

Өндіруші «Saumal» болғанымен, таратушы – қазақстандық «Neo» компаниясы. Компания қызметкерлері «Neoshubat», «Neosaumal» деген атаумен шығатын бұл құтыдағы өнімдердің 100 пайыз табиғи екенін және оның жаңа сауып алған сау­малдан құрамы жағынан еш айырмашылығы жоқ екенін айтады. Біз бұл туралы «Neo» компаниясының кеңесші-дилері Батырбек Қасымбекұлынан сұраған болатынбыз.

– Батырбек мырза, аталған өнім­дер қай кезден шыға бастады?

– Саумал мен шұбат капсуласы былтырғы жылдың қаңтарынан бас­тап өндірілуде. Сондай-ақ бізде саумал мен шұбаттан жасалған сабындар да бар, капсулалар сияқты оның да үлкендерге, балаларға арналған түрі бар. Сабын 2020 жылдың наурызынан бері  шығарылып жатыр. «Neo» компаниясының президенті – елімізге белгілі өнер иесі, әнші Нұрлан Албан.

– «Neosaumal» капсуласының жаңа сауылған саумалдан қандай артықшылығы бар?

– Иә, адамдар көбіне биені сауа салып ішкен дұрыс деп айтып жатады. Мен көп жыл бие сауумен айналысқан адаммын. Бұл технологияны өте жақсы білемін. Бие сүтінің сауылған кездегі түсі ақ болады да, 5-10 минуттан кейін өзгеріп, түсі су секілді көкшілденіп шыға келеді. Ал капсуладағы өнімдерге келер болсақ, мұнда биелерді адамдар емес, арнайы аппарат сауатындықтан жануарлардың желініне адам қолы тимейді, сәйкесінше саумалға микроб та түспейді, арнайы гигиена сақталады. Содан соң сүт 4 градус суық температурада салқындатылады, пастерленеді. Одан кейін сублимациялау нәтижесінде саумалдың құрамындағы су буланып шығады да, оны вакуум арқылы сорып алады. Нәтижесінде таза саумалдың өзі қалады. Осылай алынған саумалдың құрғақ күйі бір жылға дейін құрамын өзгертпей тұрады.

Капсула құрамында адамның асқазан-ішек жолдарына қажетті тірі бактериялар бар. Жаңағы технология негізінде осыларды «ұйықтатып» тастайды, адам оны ішке қа­былдаған кезде бактериялар қайта «оянып», жұмыс істейді.

Сондай-ақ сұйық саумал көп адамдардың ішін айдайды. Ал капсула түрі ішті өткізбейді, бірақ іш қатуда көмектеседі. Әрі мұны өзіңізбен алып жүруге, уақтылы ішуге мүмкіндік бар.

Сонымен қатар жылқылардың жайылымдағы шөбі де, жемі де, басқа да азығы дәрісіз, химиясыз өсірілген табиғи өнім. Сондықтан саумалдың құрамында да ешқандай химия жоқ.

– Капсулалардың адам денсау­лығына пайдасы қандай?

– Саумалдың да, шұбаттың да құрамы біздің ағзаға керекті макро, микро элементтер мен дәрумендерге толы деп айта аламыз. Екеуін де иммунитетті көтеру мақсатында ішу­ге болады. Саумал адамның им­мунитетін өте жақсы көтереді, қан құрамын реттейді, анемияны емдеп, гемоглобинді қалпына келтіреді. Оның жаңа сауылған сау­малмен құндылығы тең. Сондай-ақ мазасыздықты төмендетеді, жұмыс­қа қабілеттілікті арттырады. Бауыр ауырғанда, асқазан-ішек жолдары және ас қорыту жүйесі бұзылғанда, әлсіздік, шаршау пайда болғанда, эмоционалды күйзеліс кезінде, жоғарғы тыныс алу органдарының созылмалы ауруларында, отадан кейінгі қалпына келу кезеңінде пайдалануға болады.

Ал шұбатты қазақтың халық емін­де өкпе, асқазан аурулары, мешел ауруларымен қоса созылмалы түрлі дерттерден әлсіреген ағзаны қайта қалпына келтіру үшін қолдан­ған және ағза уланғанда да емге пайдаланған. Әсіресе, шұбат түрлі өкпе дертіне шипа. Шұбатта ми мен жүйке жүйесіне пайдалы қант лактозасы, диабет, ісік аллергиясы, бауыр қабынуы мен псориозға қарсы дененің иммунитетін арттыратын антителалар бар.

–  Капсуланы қалай қабылдайды?

– Таңертең тамақтанудан жарты сағат бұрын бір капсула, ұйықтар алдында бір капсула ішеді. Бір құтыда 60 данасы бар, бұл бір айға есептелген. Бір құты капсула 18 литр саумалдан алынады. Мұның қолдану ұзақтығы кемі үш ай болуы керек. Мамандар адам жасушаларының қалпына келетін уақыты 90-105 күннің арасы деп есептейді. Сондықтан мұны үш айдан кем пайдаланбау керек.

– Дәрігердің кеңесін алу міндетті ме?

– Бұл өнімдерге ешқандай дәрігердің рұқсаты қажет емес. Өйткені табиғи өнімдердің, оның ішінде ағарғандардың еш уақытта адамдарға қарсы көрсетілімі болмайды. Сондықтан кез келген адам пайдалана берсе болады. Дәрігердің нұсқаулығы қажет емес.

– Жалпы, аталған өнімдер қан­шалықты нәтиже беріп жатыр?

– Біз осы бір жылдан астам уақыт аралығында көптеген науқас адамдарға беріп, өзімізше сынақтар жүргізіп көрдік. Нәтижесі өте керемет болып жатыр. Біраз бұрын тоғыз жылдан бері бауыр ауруымен ауыратын, көкбауыры да отыруға жақын қалған бір келіншекке бердік. Жиырма күннен соң гемоглобині 156-ға  көтерілді. Жалпы, гемоглобин әйел ағзасында 160-қа дейін жетуі керек. Бірақ денім сау деген келіншектердің өзі гемоглобинін 120-130-дан асыра алмайды. Кейіннен әлгі келіншек коронавируспен де ауырды, дін аман қалды. Біз мұны саумалдың әсері деп ойлаймыз. Отадан шыққан жандар көбіне әлсіреп шығады, олар­ға да өте керемет нәтиже бе­ру­де.

– Жоғарыда шұбат пен саумалдан жасалған сабын туралы айтып қалдыңыз…

– Сабынның терінің зақымдал­ған жерлеріне, қабыну процестеріне, безеуге, бактериялар мен саңырауқұлақтарды жоюға оң әсері бар, тыртықтардан арылтуға да септігін тигізеді. Негізі косметологияда қатты сабындар бет терісіне арналмаған. Ал бұл сабындарды бет терісіне, тіпті жаңа туған нәрестелерге де қолдануға болады. Дүкендегі кәдімгі балалар сабынының құрамында химикаттар бар. Ал біздікі 100 пайыз табиғи өнім болып есептеледі. Сабында негізгі құрамнан бөлек, арыш майы, зығыр майы, қара зере майы, кокос қышқылы және тағы да басқа қоспалар бар.

– Өнімдердің бағасына тоқталсаңыз…

– «Neoshubat», «Neosaumal» капсулаларының бір құтысы – 12 500 теңге, сабын  бағасы – 1000 теңге.

– Әңгімеңізге рахмет.

Сұхбаттасқан – М. ҚҰРБАНҚЫЗЫ.

Толығырақ

Ұқсас жазбалар

Back to top button