Құмсағат

Экс-министр Елжан Біртанов әлі де «үйқамақта» отыр

Бюджет қаржысын талан-таражға салған деген күдікпен қамауға алынған бұрынғы Денсаулық сақтау министрі Елжан Біртановтың өткен жылдың қараша айынан бері «үй қамағында» отырғаны белгілі. Кешегі аптада оның «үйқамақта» отыру мерзімі кезекті мәрте ұзартылды.

21-сәуірдегі сот отырысына қатысқан Е.Біртановтың шашы, сақал-мұрты өсіп кеткен суреті бүгінде көптеген ақпарат құралдары мен әлеуметтік желілерде жүр. Осының алдында адвокаты Д.Куряченконың өз қорғауындағы адамның сақал-шашын ретке келтіруге рұқсат беру жөніндегі өтінішін сот қанағаттандырусыз қалдырған еді. Кейін оған өзін ретке келтіруіне мүмкіндік берілді. Ал прокурорлар Е.Біртановтың «үйқамақта» отыру мерзімі аяқталғалы таяғанын айтып, оны тағы да бір айға созуды сұраған болатын. Олар егер «үйқамақтан» шығарыла қалса, Е.Біртанов тергеуге кедергі келтіруі мүмкін деген қауіп білдірген еді.

Е.Біртановқа бюджеттің 526 миллион теңге қаржысын талан-таражға салған деген айып тағылып отырғаны мәлім. Егер кінәсі дәлелденген жағдайда оған кемінде 10 жылға бас бостандығынан айырылу қаупі төніп тұр. Бірақ ол бұл айыпты мойындамады, еш кінәм жоқ дейді. Е.Біртанов сотты жүргізуші судьядан өзін бостандыққа жіберуді сұраған болатын.

«Мен кінәсізбін, өзіме тағылғалы отырған айыппен келіспеймін. Құрметті судья, мені босатсаңыз екен. Мен бостандықта қоғамға көбірек пайда келтірер едім. Өйткені көп жылдық тәжірибем бар, эпидемиямен қалай күресуді білемін», – деді Е.Біртанов. Адвокаты да оның кінәсі жоғын алға тартып, «үй қамағы» бұлтартпау шарасын ешқайда кетпеу туралы қолхатпен немесе кепілге мүлік қоюмен алмастыруды сұраған. «Оны қылмыс жасады деуге еш негіз де, дәлел де жоқ», – дейді қорғаушысы. Ол сондай-ақ тергеу кезінде бірқатар заң бұзушылықтар орын алған деп те атап көрсетті.

Бұрынғы министрге сандық медициналық платформа жобасын жасауда заң бұзған деген де айып тағылып отыр. «Сол жобаны жасаған шетелдік компания өкілдерінен жауап алынған жоқ. Олардан неге сұралмайды? Е.Біртанов ол жобаның жетекшісі болмаған, ешқандай құжаттарға қол қоймаған. Бұл платформаны іске қосқан кезде ол ауруханада жатқан, сондықтан комиссия жұмысына ықпал жасауға мүмкіндігі де болмаған. Тергеу 11 айдан бері сол платформаның жұмыс істейтін-істемейтінін неге анықтай алмай жатыр?» – дейді Д.Куряченко бұған байланысты.

Қысқасы, Е.Біртановтың «үй қамағында» отыру мерзімі тағы да ұзартылды. Бұл жолы ол 14-мамырға дейін созылатын болды. Бұрынғы министрге осы уақыт аралығында жұмыс істеуге рұқсат берілді. Яғни ол таңғы сағат 8.00-ден кешкі 19.00-ге дейін үйінен шыға алады. Қазіргі министр А.Цойдың журналистерге мәлімдеуінше, Е.Біртанов бүгінде бір коммерциялық мекемеде жұмыс істеп жүр.

…Елжан Біртанов Денсаулық сақтау министрі лауазымын 2017-жылдың басынан  бастап, 2020 жылдың маусым айына дейін атқарған болатын. Маусым айында ол пневмониямен ауырып, біраз уақыт арнайы госпитальде емделіп шыққан. Кейін денсаулық жағдайына байланысты қызметінен өз еркімен босаған еді. Оның қызметтен босауына сол кездегі елде індеттің өршіп кетуі, медицина саласының оған қарсы күреске дайындығы төмендігі де себеп болған. Ал арада бірер ай өткен соң Е.Біртанов мемлекет қаржысын талан-тараж еткен деген күдікпен қамауға алынып, кейін ол сот шешімімен «үй қамағына» шығарылған еді.

Н. ӘБДІ.

Толығырақ

Ұқсас жазбалар

Back to top button