Керек кеңестер

Бөтен адамға есік ашпаңыз

Бүгінде ұрлық-қарлық оқиғалыры көбеюде. Осыған орай, сақтық шараларын да үнемі ұстай жүрген дұрыс.

* Егер сырттан келе жатқанда пәтер есігі ашық тұрған болса, үйіңізге ұры түскен деп есептеңіз. Ішке кірмеңіз. Ұры қауіпті болуы мүмкін. Ақырын барып есікті сырттан құлыптай қойыңыз. Мүмкін болса, әрине. Тез арада полиция шақырыңыз.

* Ал егер «мусор» шығарған кезде ашық есіктен байқамай ұры кіріп кеткен жағдайда тез арада сыртқа қашу керек. «Өрт!» деп айқайлаңыз. «Ұры түсті!» «Тонап жатыр!» десеңіз ешкім естімей қалуы мүмкін. Ал «Өрт!» десеңіз, бәрі көмекке келеді.

* Ұры алдыңызда күтіп алып, есікті аш десе не істейсіз? Мұндайда да жол табыңыз. Мысалы, «мен қонаққа келе жатыр едім, іздегенім бұл пәтер емес екен» деген сияқты аяқ астынан табылған амал сізді құтқарады, ұрыны састырады.

* «Сізге сәлемдеме бар», «Сауалнама жүргізуде едік» деген сияқты алдау-арбаумен үйге келетін ұрылардан абайлаңыз. Есікті ашпай тұрып анық-қанығына көз жеткізуге тырысыңыз. Немесе есікті мүлде ашпаңыз.

* Ұры үйге ұйықтап жатқанда түскен кезде де адам жағдайға қарап қимылдау керек. Аман қалу жағын ойластырған дұрыс. Қауіпсіз болып, көмек шақыруға мүмкіндік туа қалса, қарап қалмаңыз. Ал қауіпті болса, басқа амал ойластырған жөн.

* Газ баллонын, электрошокер пайдалануды білсеңіз, ол өзіңіз ғана білетін жерде тұрса пайдасы тиеді. Сигнализация, бейнекамера қойсаңыз да болады.

* Үйіңізге сантехник шақыртсаңыз да сақтық шараларын есте ұстаңыз. Оған пәтерде еркін жүріп-тұруға мүмкіндік бермеңіз. Мақтанып, байлағыңызды білдіру де жақсы әдет емес.

* Жалпы, үйге бейтаныс адамдарды ертіп келмеңіз. Бөтен адамға есік ашпаңыз. Полицияның байланыс телефонын әрдайым есте ұстаңыз.

* Ұрлық көбіне таңертең, түске дейін жасалады. Сосын түстен сағат беске дейінгі уақыт та ұрылар үшін ыңғайлы. Әсіресе демалыс күндері ұрылар торуға белсенді болады. Сыртқы есік пен терезені ашу, бұзу, сындыру арқылы да ұры көп түседі. Кілт туралау арқылы да ұрлық болады. Есте сақтаңыз, ұрлық – тонаудың қырық пайыз жағдайында ұрылар есікте ұмыт қалдырылған кілт арқылы тексеруші, сауалнама алушы ретінде үйге кіреді екен.

* Бірер минутқа шықсаңыз да есікті әрдайым құлыптап жүріңіз. Сыртқа шығарда, ішке кірерде жан-жағыңызға мұқият қарап алыңыз. Қазір жаба саламын ғой деп есікті кілттеуді ұмытып кетіп жүрмеңіз. Ұры үшін бірнеше секундтың өзі жеткілікті.

* Жарық кенеттен сөнсе, терезеден қарап, жан-жақта қандай, соны анықтаңыз. Көршілеріңізге хабарласыңыз. Шиттен көремін деп есікті ашып жүрмеңіз. Ұры аңдып тұрған болуы мүмкін. Айтпақшы, сыртқы есігіңіз мығым, құлып жақсы болсын.

* Сыр сақтаңыз. Мақтаншақ болмаңыз. Көрші-қолаңдармен жақсы қарым-қатынаста болыңыз.

* Есікті біреу қақса, алдымен оның кім екенін біліп алыңыз. Бірден ашпаңыз. Қысқасы, сақ жүріңіз. Ақша, құнды нәрселерді бір жерде емес, бөліп сақтаңыз.

М. СЕМБЕК.

Толығырақ

Ұқсас жазбалар

Back to top button