Кешегі аптада Шымкент қаласындағы «Күл­тай ана» базарының басына қара бұлт үйі­рілді. Сәрсенбі күні таңертең онда барған­ сот орындаушылар: «Базарды бұзамыз. Бұл – сот шешімі» дегенді айтқан. Сосын олар алып барған трактор базардың ше­тін­дегі бір ғимаратты бұзып тастаған. Бұл осындағы саудагер­лердің қатты наразылығын тудырды. Нәтиже­сінде сот орындаушылары ғимаратты бұзуды тоқтатқан.

Хабар түскен сәтте біз де аталған базарға­ бардық. Бірден көзге түскені, базардың сол шақ шетіндегі бір ғимараттың быт-шыты шы­ғыпты. Екі жігіт қираған үйінді үстінен сынған­ ағаштарды бір шетке алып реттеп жатты. Ал анадай жерде топ-топ болып  саудагерлер тұр. Бәрінің көңіл-күйі жоқ. Осы жерде базар бас­шысы Сәуле Мәденованы (суретте) жолықтырдық.

Өткен аптада Солтүстік Қазақстан облысынан келген  Әміразар есімді азаматпен сұхбаттас болғанымыз бар. Шымкентке пойызбен келген екен, сөз арасында жолкіре тура­лы әңгіме болды. Ол Петро­павлдан Шымкентке дейінгі билетті 2023 рубльге (10.041 теңге) алыпты. Ал Шымкенттен Петропавлға дейінгі билет құны 4900 теңге тұрады екен. Билет бағасындағы мұндай айыр­машылықты Әміразар Петро­павл­дың теміржол вокзалы Ресейге қарайтынымен байла­нысты деп айтты. Алғашында біз оның сөзін түсінбей қалғандықтан себебін қайта сұрадық.

Осыдан екі жылдай бұрын Елбасы Оңтүстікке келген  сапарында облыс­тық опера және балет театрының салтанатты ашы­лу рә­сіміне қатысқан болатын. Содан бері біршама уақыт өтті. Театр шама-шар­қы­на қарай бірнеше қо­йылымдарды сахналады. Енді осы ай­да «Қыз Жібек» операсын көрермен назарына ұсынбақ.

Өкінішке орай, осындай үлкен ұжым алты айдан бері басшысыз отыр. Бұрынғы директор қызметтен кеткелі директордың міндетін уа­қытша атқарушы болып осыған дейін облыстық филармонияда көркемдік жетекші қызметін атқарған Айман Қарсыбаева тағайындалған. Ал жұртшылық арасында алты айдан бері театрды басқаруға бір адамның табылмауы қалай деген сұрақ жүр. Осы орайда біз өткен бейсенбіде театрға барып, қызметкерлерді әңгімеге тарттық.

Биылғы жыл басынан бері де редакциямызға  хат жазып, хабарласып жатқандар көп. Оқырмандарымыз өздерін толғантқан мәселелер бойынша өтініштерін айтады, көмек сұрайды, алғыстарын білдіреді. Газетіміздің бүгінгі нөмірінде солардың бірнешеуін жариялап отырмыз.

Күләш апа алғыс айтты

Кешегі сәрсенбіде шымкенттік Күләш есімді апа редакциямызға телефон шалып, редакция ұжымына өз ризашылығын білдірді. «Қарақтарым,­ мен сендерге аналық алғысымды жеткіземін, – деді ол кісі. – Мен «Замана» мен оның қосымшаларын үнемі алып оқып тұрамын. Бұл газеттердегі мақалалар мен танымдық материалдардың, хи­кая­лардың жұртқа берері мол. Маған әсіресе «Қы­зық газеттің» биылғы 1-ші және 2-ші нөмірлерінде жарық көрген «63 жасында үйленген адам», «Детектив» атанған азаматтың шытырман оқиғалары» деген тақырыппен шыққан хикаялар ұнады. Оқырманға осындай мәнді, мағыналы дүниелерді ұсынып отыратын редакция ұжымына алғысымды білдіремін. Өркендерің өссін!»

Өткен аптада редакциямызға Сарығаш ауданының Жаңаталап ауылынан Жиенбек Баймырза (суретте) есімді азамат келді. Бұл кісі көп жылдар­ бұрын жол апатына ұшыраған екен. 1994 жылдан бері басы ауырады. Уақыт өте келе құлағы да естімей қалған. 2008 жылдан бастап мерзімсіз уа­қытқа ІІІ топтағы мүгедектікке шығыпты.

«Жас келген сайын ауру үстіне ауру жамала береді екен, – дейді Ж. Бай­мырза. – Қазір ауырмайтын жерім жоқ. Жүрегім де, бүйрегім де ауы­рады. Қан қысымым да жиі-жиі көтеріліп мазамды алады. Біраз жылдар бұрын плевритпен де ауырып, ауруханада ем қабылдадым. Жақында Сарыағашта ауруханада жатқанымда мойным мен оң жақ аяқ-қолым ісіп, жүрегім шаншып, есімнен танып қалдым. Дәрігерлер ауруымның анық диагнозын таба алмады. Жүрегімді УЗИ-ге­ түсіріп, мені Шымкенттегі диагностикалық орталыққа жіберді. Әйткенмен ондағылар да ау­руымның себебін нақтылай алмады. Кейін ине салып, түрлі дәрілермен емделгенімен одан еш нәтиже шықпады. Инеден кейін қол-аяғым қайта ісіп кетті. Диагностикалық орталыққа қайта барып түскенімде анық болғаны, жол апатына ұшыраған кезімде омыртқама ет қыстыры­лып қалған екен».

Редакциямызға Төлеби ауданындағы Қаратөбе елді мекенінің тұрғыны Мырзақұл Тұрғынбаев деген кісіден хат келді. Хатында ол 2004 жылы туылған немересі Жанерке Ғаниқызын төрт рет рентгенге түсіргені, рентгенде жамбас сүйегінің кемтар екені анықталғаны туралы жазыпты. Жанеркенің Шымкент балалар ау­руханасында және Көк­сәйектегі ауруханада емделгені туралы ауру тарихы да бар екен. Қызға дәрігерлер «Острый бронхит, врожденный вывих обеих­ бедер» деген диагноз қойған.

Осы құжаттар мен N88 нұсқадағы жолдаманы алып М.Тұрғынбаев Ленгірдегі ме­ди­циналық-әлеуметтік сараптамалық бөлі­мі­не барыпты. Алайда комиссия мүше­ле­рі қыздың жазылып кететінін айтып оларды екі рет қайтарып жіберіпті. Одан кейін М.Тұрғынбаев ол жерге баруды до­ғарған. Ал немересі Жанерке 2009 жылдың қазан айынан бері Балықшыдағы сүйек-буын туберкулезі ауруханасында ем­деліп жатыр екен. Оның әлі қанша уа­қыт емделетіні белгісіз екенін айта келіп М.Тұрғынбаев: «Осы жағдайды еске­ре отырып жәрдемақы төлене ме, ол өзі қалай төленеді? Бұрынғы өткен жылдары есепке алына ма? Осы жағдайды біл­гім келеді. Осыны анықтауға көмектесіңіз­дер», – деп сауал жолдапты.

Қазір ауруханалардың барлығында тазалық пен тәртіптің орнап жатқаны көпші­лікті қуантады. Дегенмен кейбір олқылықтарды көргенде көңіліміз бәсең тартып қа­латыны бар. Жуырда өзім куә болған мына бір оқиға мені қатты қынжылтқан еді.

Інім көлік апатының салдарынан биыл төртінші жыл қайта-қайта операцияға түсуде. Қазір ол Шымкенттегі облыстық аурухананың ортопедия бөлімінде жатыр. Кешегі сенбі күні ауруханаға барып, осы бөлімге кіру үшін есіктің аузындағы «бахилла» сататын автоматқа 20 теңге салғанмын. Ол шығарған «бахилланы» ашып көргенімде оның сыңары жоқ болып шықты. Есік аузындағы келіншектен мән-жайды сұрайын десем, ол құлағына қалта телефонын тақап алып, 15 минуттай біреумен сөйлесіп тұрды.

Өткен аптаның басында редакция­мызға Отырар ауданынанмын деп бір кісі телефон арқылы хабарласты. Ол адам жуырда аудан орталығы Шәуілдірде үлкен той болып, оған аудан әкімі мен мәслихат хатшысы да қа­тыс­қанын, ол жерде орталықтағы мұражай директоры мастықпен ортаға шығып алып, Астанадағы жоғары лауазымды адамдар мен «Нұр Отан» партия­сының, оның бірінші басшысы Нұрекеңнің атына былапыт сөздер айт­қанын жеткізді. Осы сөздің анық-қанығына көз жеткізу үшін біз Шәуілдірдегі бірқатар адамдарға телефон шалдық.

«Бұл қайдан шыққан сөз еке­нін білмедім, – деді аудандық мәслихат хатшысы Әділ­хан Мақатай. – Осындай сөз аудан ішіне тарап кетіпті. Шамасы, бұл мұражай директорының қызметіне көз алартып жүрген біреудің арандату тір­лігі болса керек. Әйтпесе ол кісі тойда отырған кезде пар­тия­ны мақтағаннан басқа ештеңе айтқан жоқ. Егер түсін­бес­тік бір нәрсе болса, мен сөз айтуға шыққан кезде болуы мүмкін. Сондықтан әлгі әң­гімені естіген сәтте Нұртаза Ал­дабергеновты өзіме шақыртып сөйлестім. Ол кісі тойда арақ ішкен жоқ еді. Өзінің «Нұр Отанға» шын берілген адам екенін айтып отырған. Менің алдым­да да сол сөздерін қайталады. Тойға дейін де, тойдан кейін де басы артық сөз айтпағанын өз қолымен қа­ғазға жазып берді. Бары осы».

Шымкент қаласының білім бөлімі Сізге «Замана» газетінің 2010 жылдың 25 қаңтары № 03 санындағы Р.Шалқардың «Арызды ашынған адам жазады Шымкенттегі тағы бір мектеп ұжымы у-шу болып жатыр. Демек...» тақырыбындағы мақаласына мына төмендегідей мәлімдейді:

№52 орта мектеп мұғалімдерінің атынан түскен арызда көрсетілген ақша жинау фактілерін анықтау білім бөлімінің құзырына жатпайтындықтан арызды Қазақстан Республикасы «Жеке және заңды тұлғалардың өтініштерін қарау тәртібі туралы» Заңының 7 бабы, 6 тармағына сәйкес қаржы полиция­сының тексеруіне жіберген болатын. Сонымен қатар Абай аудандық прокуратурасы мен облыстық білім басқармасына да осы мәтінде арыз түскен.

«Замана» газетінің 2010 жылдың 18 қаңтардағы №2 санында «Балаларымыз көз алдымызда солып бара жатыр» атты мақаласында Сайрам ауданының Жаңаталап ауыл округіндегі Игілік ауылының тұрғындарын таза ауыз сумен қамтамасыз ету жөнінде төмендегідей жауап жолдаймын:

Кеңес дәуірінде іске қо­сылған су жүйелерінің бүгінгі техникалық ахуалы, 32 метр те­рең­діктегі 3 су ұңғылары суы­ның сапасы санитарлық нормаға сәйкес келмейтіні се­бепті, «Жол картасы» бағдарламасы аясында бөлінген қаржы есебінен, Жаңаталап ауыл округі Жаңаталап, Қарасу және Игілік ауылдарының тозығы жеткен 5,5 км су жү­йе­лерін ағымдағы жөндеу­ден өткізуге 2009 жылы 20,0 млн теңге және тереңдігі 70 – 100 метр болатын жаңа су ұңғы­сын қазуға 19,0 млн теңге мақ­сатты түрде бағытталды.